إسم الله الباقي
( للداعية / مصطفى حسني)
اسم النهاردة من أسماء الله الحسنى اسم يفتح القلب للتعلق بالله واسم يساعدك تبقى دائما تحافظ على العلاقات و المقربين منك.
اسم النهاردة هو اسم الله (الباقي)
اسم الله. الباقي من الأسماء إللي وردت بالنص كده في حديث النبي صلى الله عليه وسلم.
(البديع الباقي) كما قال صلى الله عليه وسلم
أما معنى بقاء ربنا فهو منتشر في القرآن، وأشهر الآيات إللي بتتكلم عن الباقي (كُلُّ مَنْ عَلَيْهَا فَانٍ (26) وَيَبْقَى وَجْهُ رَبِّكَ ذُو الْجَلالِ وَالإِكْرَامِ)(الرحمن"27") . والآية التانية (كُلُّ شَيْءٍ هَالِكٌ إِلَّا وَجْهَهُ ۚ لَهُ الْحُكْمُ وَإِلَيْهِ تُرْجَعُونَ) (القصص "88") والباقي في اللغة معناها الذي لا يقبل الفناء فكل شيء يفنى ويهلك، ولا دايم إلا وجه ربنا سبحانه وتعالى.
وفي السنة بيحكيلنا النبي صلى الله عليه وسلم إن بعد فناء أهل الأرض، ونفخ في الصور، فصعق من في السماوات ومن في الأرض، يفنى أهل السماوات، ولا يبقى في الأكوان إلا الله، وينادي رب العالمين لمن الملك اليوم؟
ويقول الملك اليوم لله الواحد القهار، ثم يأمر ربنا سبحانه وتعالى بإحياء إسرافيل عشان ينفخ في سور مرة تانية.ويقام الخلائق ليوم القيامة والبعث.
بسم الله الباقي هو إللي ثبت الصحابة عند أكبر شدة مرت بيهم يوم وفاة النبي عليه الصلاة والسلام.
السيدة عائشة بتقول وكنت حديثة السن ، فلما ثقلت رأس النبي على كتفي. حطت النبي كده على السرير، وطلعت في المسجد تقول مات رسول الله عليه الصلاة والسلام، فسيدنا علي وسيدنا عثمان أعدوا في الأرض مش قادرين يتكلموا، سيدنا عمر طلع على المنبر وقال مماتش ما مات رسول الله، إنما ذهب للقاء ربه، كما ذهب موسى، ورفع السيف كده.محدش يقول النبي مات. مش مصدقين..لغاية ما جه سيدنا أبو بكر ، دخل على النبي عليه الصلاة والسلام فقبله بين عينيه، وقالت طبت حياً وميتاً يا رسول الله .
والحقيقة فيه معنى جوايا أنا كمان لما بقرا كلام العلماء عن ربنا سبحانه وتعالى بيجي في قلبي كده إن مش بس الله باقي حي لا يموت، ده كمان ربنا باقي عليك، باقي على علاقتنا سبحانه وتعالى أكتر حد باقي ليك لن يتركك أبداً هو ربك إللي خلقك.
افتتح الله سبحانه وتعالى قصص القرآن بقصة سيدنا أدم عليه السلام، يوم ما ربنا قال لسيدنا آدم أنا أحب أشوفك، مبسوط في الجنة، (كلا منها رغدا حيث شئتما، ولا تقربا، هذه الشجرة) ، أكل منها سيدنا أدم. وستنا حواء ولما أكلوا منها فأكل منها، وبعدين ربنا نادى عليه، بعد ما أكل طلع يجري كما في بعض الروايات يا آدم الله تعالى فرارا مني؟، قال بل حياءً منك قال له يا آدم، أنا هعلمك كلمات تطلعك من إللي إنت فيه، سيدنا آدم؟ كان ندمان ندم شديد، هقول لك حاجات نتصالح ترجعلي.
(فَتَلَقَّى آدَمُ مِنْ رَبِّهِ كَلِماتٍ فَتابَ عَلَيْهِ إِنَّهُ هُوَ التَّوَّابُ الرَّحِيمُ)(الأعراف"23") يعني أنا زعلتك إنت إللي اتصلت بيا عشان نتصالح قد إيه إنت باقي عليا سيدنا آدم إللي عصى ربنا، ربنا إللي قال له يقول إيه علشان يرجع الود تاني؟ وده إللي إنت بتشوفه كل يوم. لما بتعمل ذنب بالليل تصحى الصبح تلاقي ربك.
سيدنا النبي يقول لك إن الله يبسط يده بالنهار ليه؟ ليعذب لينتقم؟ لأ ليتوب مسيء الليل،
فأنا إللي بعصي وهو إللي بيدعوني للصلح لإنه باقي عليك .
عشان كده اسم الله الباقي من الأسماء إللي تخلي الإنسان يدرك هو مين بالنسبة لربنا،
ويدرك حاجة تانية كمان.
تعلقك بإسم الله الباقي إن ربنا باقي ليك أكتر من مديرك إللي بيقول لك اكذب عشان تعرف تبيع السلعة إللي بتقوم ببعيها.
باقي ليك أكتر من حد بيضغط عليك وبيدخلك في علاقات مسمومة محتاج إنك تمثل فيها وتطلع من قيمك عشان ترضيه ، اعتذر عن هذه النوعيات من العلاقات إللي بتخلي الإنسان ينام وهو مش طايق نفسه.
شوف تعلق بني إسرائيل بربنا، لما فرعون كان عايز يعذبهم، لما قال لهم لأقطعن أيديكم وأرجلكم من خلاف، ولأصلبنكم في جذوع النخل .قالو لن نؤثرك على ما جاءنا من البينات، والذي فطرنا فاقض ما أنت قاض، إنما تقضي هذه الحياة الدنيا (إِنَّا آمَنَّا بِرَبِّنَا لِيَغْفِرَ لَنَا خَطَايَانَا وَمَا أَكْرَهْتَنَا عَلَيْهِ مِنَ السِّحْرِ ۗ وَاللَّهُ خَيْرٌ وَأَبْقَىٰ )(طه "73").
فتعلق بالباقي دائما وتخلق بالباقي ، ربنا باقي عليك وباقي ليك لا يفنى من حياتك، ولا يفنى من الأكوان. سبحانه وتعالى رب الكون أنت كمان خليك باقي على الناس.
شوف سيدنا النبي عليه الصلاة والسلام لما قال ينادي يوم القيامة قبل الحساب ليقم من كان أجرهم على الله، فيقوم من كانوا يعفون عن الناس، ده باقي على العلاقة بيعدي المواقف عشان نفضل قريبين لبعض، فمن عفى وأصلح فأجره على الله فيقوم فيذهب إلى الجنة قبل بدء الحساب ليقم من كان أجره على الله.
فكر إزاي تبقى باقي على العلاقات وتحافظ على روابط المودة بينك وبين إللي حواليك، يبقى إنت كده بتتخلق بسم الله الباقي مع الخلق .